Nú er

Enn eitt árið að líða og ekki fjölgar hárunum á hausnum á mér.

Ég náði þó að safna mér í örlitla bumbu með reykbindindinu. Það er miklu meira til af Bamba um þessi áramót en í fyrra sem hlýtur að vita á gott.

Árið var á allan hátt hið ágætasta með bráðskemmtilegum ferðum, bæði í veiði og til að túristast á erlendri grund. Bambi veit fátt skemmtilegra en slíkar ferðir bæði með hans ástkæru frú og góðum vinum.

Ég óska ykkur gleðilegs árs og megið þið hafa þökk fyrir það gamla elsku dúllurnar mínar.

Ég óska ykkur

Öllum gleðilegra jóla elsku kútarnir mínir

Uss

Hvað er gott að klára prófin

Mér líður eins og tíuhjóla trukkur hafi keyrt yfir mig.

Úff þrjú próf á þremur dögum er eins og skáldið sagði túmöjts.

Enda er ég búinn að vera með hálfgert óráð síðustu nætur þar sem sá litli svefn sem ég hef fengið getur af sér óþægilega drauma tengdu námsefninu og ég vakna upp í svitakófi.

Gaman samt að mig dreymdi að einn vinur minn væri risastór flyðra.

Hvað skyldi það nú merkja?

Uff

Hvað mjér leiðast próf

Er samt að hugsa um fjörið eftir þau....

Samkvæmt hjátrúnni þá ættu bakeymslin sem ég hef náð mér í sökum þess að bogra við skrudduhelvítin að læknast með tvennum hætti að minnsta kosti.

Annað hvort að bera volga kúamykju á bakið á mér eða þá að njörva hreina mey við bakið á mér og bera hana þar nokkra stund.

Hmm... á nokkkuð létt með að tryggja mér mykju en hreina mey? Ætli Siggi telji?

Að vera hjálpsamur

Virðist stundum snúast í öndhverfu sína.

Í dag eyddi ég heilmiklum tíma af dýrmætum matartíma í að koma þrastarunga í neyð á öruggan stað til að vera á.

Bölvaður vitleysingurinn hafði yfirgefið hreiðrið alltof snemma til að skoða heiminn( Þrestir verða greinilega gelgjur líka) og vappaði umkomulaus og ófleygur fyrir utan vinnuna hjá mér.

En mér datt í hug það snjallræði að allvega flytja hann á nálægan skúr til varnar svöngum kisum mávum og öðru af slíkri sort.

Skemmst frá því að segja að eftir tíu mínutna eltingaleik þá var aumingin nær losti af skelfingu og ég engu nær að ná honum.

Æi er ekki til eitthvað sem heitir að vera að skipta sér af því sem manni kemur ekki við?

Ja hver fjárinn

Bara tvær færslur í röð.

Það er svona þegar eitthvað markvert gerist.

En ég má til með að deila lesendum frá reynslu minni í nótt sem leið. Æi nei hættiði nú ekki sperrast allir upp þetta hefur ekkert með holdlegar fýsnir, búkhljóð eða undirmigu að gera.

Málið er það að ég brúka stundum eyrnartappa og komst að því í nótt þegar ég vaknaði um fjögur leitið að þeir eru hreint ekki góðir á bragðið.

Ég semsagt vaknaði með eitt kvikindi sundurtuggið upp í mér og á leiðinni á klósettið að skola munninn rann upp fyrir mér að mig hafði dreymt að það væri nikótíntyggjó í rúminu sem ég ætlaði að narta í.

Í fyrsta lagi er ég að hugsa um að hætta að nota eyrnatappa, ég gæti kafnað á þessu helvíti næst.

Nú og ef það dugar ekki þá verð ég náttúrulega að byrja að reykja aftur!

Þetta hefur gerzt

Síðan síðast.

Fór með Siggamus í afar velheppnaðan veiðitúr í Laxá í Kjós, bara helvíti flottir á því kallarnir. Að vísu ódýrasti tíminn enda fór það svo að við fiskuðum einungis urriða af ýmsum stærðum sem laxveiði gengur víst ekki út á.

Samt var þetta snilldar túr og dagurinn leið eins og örskot. Enda fór það svo að ég er búinn að gabba Sigga í meira og er kominn með samviskubit yfir að vera að gera hann gjaldþrota með veiðileyfakaupum.

En fé er bara til að fórna því í fjör.

Hef samt örlitlar áhyggjur af úthaldi okkar gömlu kallana. Túrinn í Kjósina var bara einn dagur og við vorum tvær vikur að jafna okkur. Næst á að taka 3 daga í beit...Vúhibbidíha

En ég hef þó 2 vikur á Kanarí að jafna mig eftir það...

Merkilegt

Hvað það er erfitt að vaska upp glös. Eða fyrir mig það er að segja. Mér virðist fyrirmunað svona nær alltaf að hreinsa burt skánina sem vill setjast á brúnina auk þess sem glasadruslurnar verða svona skýjóttar og ógagnsæjar.

Enda fæ ég þetta alltaf í hausinn aftur frá gæðaeftirlitinu.

Ég vil meina að ástæðan sé sú að illmögulegt er að vaska upp með gleraugu. Og gleraugnalaus á ég erfitt með að sjá nógu vel bannsettan skítinn á glösunum.

Þannig að ég sé þrennt í stöðunni:

A: Að hætta að vaska upp(fara í verkfall)
B: Að fá vinnukonu
C: Að fara í leysisjónaðgerð

Sjá dyggir lesendur einhverja fleiri kosti í stöðunni og hvað myndu þeir ráðleggja Bamba?

Snægrefillinn

Hér sé líf.

Leiðist að horfa upp á aumingja síðuna svona átdeitet.

Það hefur svo margt gerst síðan síðast að jafnvel kvart væri nóg. Bambi er víst að fara til Mónakó auk þess að skella sér með frúnni til Kanarí þar sem lögð verður stund á mullers æfingar og sjóböð.

Svo höfum við haft pylsur í matinn alla vega 5 sinnum síðan ég bloggaði síðast.

Gott ef ekki hefur hlýnað líka.

Afsakið Hlé

Sökum anna er og verður svolítið hlé á blaðri.

Próf+verkefni+vinna+leikæfingar= engin tími í fánýtt nethjal.

Að bera sál sína

Á þessu nettorgi hefur ekki reynst Bamba með öllu auðvelt. En samt hann hefur þó ekki verið allsber með öllu. Meira svona topplaus.

Fjárinn hafi það ef þetta hefur ekki gert gott.Og afmáð að einhverju leyti hræðslu við að opinbera sig.

Auk þess þá er allt satt sem lærðir menn segja um að æfingin skapi meistarann. Bráðum verður Bambi meistarinn...

Eða Margaríta

Bíll

Janfnvel í augýn eftir laaanga leit, en það skýrist betur innan viku.

Annars er æfing í kveld hjá Hugleik. Þetta hlutverk mitt er að valda mér heilabrotum og ég er ekki alveg með á hreinu hvernig ég á að tækla það. Hef aldrei áður leikið svona yfirgangs hrotta, er ekki alveg að finna týpuna í mér. En það gengur vonandi, annars geri ég mig bara að fífli.

En já meðan ég man þetta er færsla númer 60. Til hamingju með það Bambi(klappar sér á bakið).

Patataz

Bambi gerðist menningarlegur í enn eitt skiptið í gær og fór í leikhús. Passaði sig þó á að vinna á móti menningarneyslunni með neyslu á Amerískum skyndibita á undan.

Fór að sjá leikverkið Patataz eða kartöflur sem Hugleikur bauð upp á. Ágætis verk, svolítð seigt í byrjun en vann á.

Í dag hef ég svo hámarkað plebbahátinn með því að þræða bílasölur enn eina ferðina með frúnni. Mikið skelfilega er það leiðinlegt! Það virðast allir hafa fengið þá flugu í höfuðið að kaupa sér nákvæmlega eins bíl og við á nákvæmlega sama tíma því framboðið er nánast ekkert.

Pant fara að finna kerru bráðum og hætta að standa í þessu bulli.

Vinningurinn sem ekki var

Vinningur

Nú hef ég endanlega gefið upp á bátinn heimsókn til góða dátans Sveik. Verð að viðurkenna örlítið svekkelsi og vanlíðan út af þessum málalokum.

Smá ábending til fyrirtækja.

Ekki gefa vinning sem verður þess valdandi að þið missið kúnna frekar en hitt.

Svikavor

Ullabjakk bara á þetta veður,ég hélt ég yrði úti á leiðinni í skólann. Halló...er ekki apríl? Ég vil Lóukvak og kýr í haga ekki þetta hélaða él að norðan.

Og meðan maður skelfur hér á skerinu er fólk að striplast á stuttermbolum í Evrópu lepjandi ís. Þetta bara er ekki sanngjarnt, hver sér eiginlega um að úthluta manni landi þegar maður fæðist?
Ætli það sé einhver kvörtunardeild þar ?

Að fara

Eða fara ekki til Prag það er stóra spurningin. Nú er ég alveg að brenna inni með þennan ágæta vinning minn og því orðið spurning um að hrökkva eða stökkva.

Vorðið í Prag ku vera yndælt en það er spurning um hvort ég myndi njóta þess sem skyldi með bullandi samviskubit yfir óleystum verkefnum í skólanum. Apríl er nefnilega hábölvaður tími til utanfara þegar maður er í námi með tilheyrandi verkefnaskilum.

Kannski að ég kasti bara krónu upp á þetta?

Ég veit

Ekki hvort það er nikótínleysið

En mér er bara orða vant hreinlega. Reyni og reyni að skrifa en sé alltaf bara feitan vindil á skjánum.

Það er engin léttavigt að hætta þessum andskota en ég skal...

Allavega þangað til á Kúbu

Veyðispjall

Bambi er forfalin áhukamaður um fiskveyðar og les því offt spjalborð á ágætum Veyðivef enn þar stinngur sfo hirkaleka í augu hve veyðimen viðrast ila sgrifandi Ovt er meira að segja eins og þeir skeli ufsilonnni hér og þar alveg tylvyljunnarkent í orðinn og sjaldnst þá á réta staði.

Þeta er óþolanndi anndskoti!

Bambi snýr aftur

Eftir hreint dásemdar dvöl í sveitinni.

Nú tekur lífsbaslið við eftir frí og klukkan hringir miskunnarlaust eldsnemma á morgnanna.
En Bambi getur þó yljað sér við minningar um kind. Eða var það gimbur? Ársgamlar kindur
Eru það gimbur? Kindbur?

Bambi var nefnilega þeirrar ánægju aðnjótandi að fá að eiga og skíra lamb síðastliðið vor sem nú er orðin bústin og myndarleg rolla. Hún heitir Ragnheiður og er svona svört með hvítan díl á rassinum, bar algerlega af öðru fé í sveitinni.

Uppi eru grunsemdir um að hún sé lömbuð þannig að það verður spennandi að sjá í vor hvort ekki enn bæti í flokkinn. Kannski að Bambi geti þá farið að sækja um landbúnaðarstyrki?

Kæru lesendur

Nær og fjær

(Ég veit um allavega einn lesenda fjær og nokkra(eða tvo) nær og því tel ég mig eiga innistæðu fyrir svo hátíðlegu ávarpi).

Ég óska ykkur góðra stunda um páskana og megi eggið vera stórt.

ykkar einlægur

Bambi

Ég veit

Þetta hefur verið fremur lágdautt frá því fyrir helgi og lítið hér að lesa.

En ég hef verið fremur upptekin við þessi fjárans ritgerðarskrif.
Guði sé lof að því er lokið og nú sé ég fram á langþráð Páskafrí.

þá er bara að vona að blíðan haldist.

Nú er það aftur komið

Vorið

Enn er bjart þegar þettta er skrifað á matmálstíma og sólin er að setjast yfir spegilsléttum sænum.

Getur maður nokkuð annað en verið bjartsýnn á svona stundu.

Ritgerð-smitgerð

Góða helgi

Bambi

Það koma dagar

Þar sem manni virðist gersamlega ómögulegt að koma frá sér óbrenglaðri setningu. Hugmyndaflugið virðist hafa slökkt á sér og á skjánum sést ekkert annað enn þessi óþolandi blikk bendill á hvítum fleti.

Ég á að vera að skrifa fimmtán blaðsíðna ritgerð um gildi leiklistar fyrir menningartengda ferðaþjónustu sem á að skila á mánudaginn. Hljómar spennandi ekki satt?

Bambi sér fram á alveg bráðskemmtilega helgi!

Atóm

Ber


Við vorum ber
þegar við átum ber
skjálfandi ber
en svo náðirðu í teppi

Ekki meir, ekki meir

Þetta er nú meiri sjálfspyntingarárráttan í Bamba blessuðum. Nú er hann búinn að lofa sér í leikrit og fyrsta æfing er í kvöld. Alltaf gaman að leika og lítið yfir því að kvarta en leiklist er tímafrek og tími er eitthvað sem er af skornum skammti þessa dagana. Af hverju getur Bambi ekki lært að segja nei svona stöku sinnum? Jæja, en víst maður er búinn að henda sér út í djúpu laugina þá er bara að taka því. Ég verð bara að sofa minna eða hreinlega sleppa því og vinna þannig upp tíma! Mikið afskaplega hlakkar mig til í sumar þegar ég verð “bara” að vinna. Það verður eins og að vera í fríi.

Nú þýðir víst ei meir

Að gaspra eitthvað ábyrgðarlaust. Bambi glopraði adressunni að blaðrinu í dag og því þarf hann að vanda sig vel og vandlega fyrir næstu færslu. Hún bíður því líklega fram yfir helgi.

Helgi magri

Góða helgi!

Júbbí alveg magnað

Magnarinn Magni kom loks í dag,langþráð stund enda er ég búinn að bíða síðan í Janúar. Mikil var gleði mín og tilhlökkun þegar ég opnaði kassann og sá að þar var alvöru magnari en ekki gamall tóner og ljósritunarpappír(sjá fleiri sögur af magnarakaupum). Ekki var verra að þeir öldungis öðlingar í shopusa sýndu þá góðu þjónustulund að láta Bamba sleppa við að borga fyrir flutningskostnað. Þegar magni kom til framtíðarheimkynna sinna þá var byrjað á því að taka hann ofurvarlega úr þrönga kassanum sínum og síðan eyddi Bambi næstu klukkutímunum í að lesa manjúala og setja allt upp svo það yrði alveg fullkomið, ekkert átti að klikka í þetta sinnið. Enda bárust strax ómþýðir tónar úr Magna og Bambi hlustaði hugfanginn, magnað! En viti menn Magni sem var svo sprækur og svo hress hann, hann bara dó eftir hálftíma notkun án nokkurar viðvörunnar. Bambi varð algerlega miður sín og hélt að allt væri fyrir bí eitt skiptið enn, en honum til mikils léttis kom í ljós að spennubreytirinn réði ekki við kraftinn í Magna og hafði því farið yfirum. Nú er Magni kominn með nýjan breyti sem næstum jafn stór og sjónvarpið okkar og allir una glaðir við sitt.

Hefhuffpuffbuff

Bambi búinn að pikka svo mikið í dag að fingurnir láta orðið illa að stjórn. Búinn að vera að fikta við það í allan dag að útbúa skoðunarferðir á Kúbu. Svosem hið skemmtilegasta verkefni en ég er þurrausin bæði til huga og handa eftir þetta og því er ég hreinlega að babbla hér um ekki neitt. En já meðan ég man. Hvenær ætlar jonkurteiz nú að fara að stofna eigið blogg í stað þess að fá eingöngu útrás fyrir sköpunargleðina í kommentakerfum hjá saklausu fólki?Það væri gaman að geta lesið um hvað jonkurteiz er að sýsla við, svo ég tali nú ekki um ef nokkrar myndir fylgdu.

Brumm brumm bíp bíp

Segir bíllinn.

Við frú B erum í því veseni þessa dagana að uppfæra fjallatrukkinn okkar Ísbjörninn góða. Hann hefur þjónað okkur vel sá gamli en er kominn á aldur og í bílamálum er það víst full leyfilegt að yngja upp án þess að það kalli á almenna hneykslan. Vandamálið er bara hve óhemju tímfrekt leiðindavesen það er að kaupa sér notaðan bíl. Það eru hlutir eins og viðmiðunarverð, verð, árgangur, útlit og hvaðeina sem þarf að velta fyrir sér auk leiðinda skoðunarferða um bílasölur bæjarinns. Ég velti því hér upp ágætri viðskiptahugmynd fyrir unga bílaáhugamenn,(sem er til hellingur af hef ég heyrt) setjið upp bílakaupaþjónustu fyrir fólk sem hefur ekki hundsvit á þessu og vill ekki hafa það og rukkið einhverja þúsundkalla fyrir greiðan. Ég verð fyrsti viðskiptavinurinn.

Morning has broken

Hmm hvernig væri þetta þýtt? Morgunn hefur brotnað eða morgunskíma skóflar nóttinni frá? Morgunhjal hjá Bamba. Morgnarnir eru nefnilega farnir að verða svo miklu þolanlegri þegar það er ljóstýra í herberginu í stað þess að vakna og vita varla hvort það er nótt eða dagur nema með því að líta á klukkuna. Vorið er í nánd og maður er farinn að verða eitthvað miklu bjartari og bjartsýnni með hverju hænuskrefinu sem sólin stígur hærra á himinhvolfið. Bara verst hve óendanlega mikið er að gera á öllum vígstöðvum og Bambi svo óendanlega latur. En jafnvel það er að skána með hverjum deginum, ég sver það!

Bravo

Heyrðist fína fólkið hrópa upp yfir sig þegar Jóse gamli hafði lokið við að hrista nokkra undurfagra tóna úr gullbarkanum. Jamm fór að sjá kallinn í gær, hvursu menningarlegur getur maður verið? Ekki það að ég hafi keypt miðann, mér myndi nú seint detta í hug að splæsa í tuttuguþúsund króna miða fyrir mig og frúna en ég virðist óhemju heppinn þessa daganna og ég vann tvö stykki.
Allt fína fólkið var auðvitað á svæðinu í sínu fínasta pússi og svo við frú Bambi. Skemmtum okkur ágætlega. Það er viss upplifun að sjá einn frægasta tenór heims svona live og Jóse hefur alveg hvínandi rödd og syngur með mikilli tilfinningu. Enda var hann klappaður upp þrisvar og virtist hrærður sjálfur á mótökunum kallinn. Bravó Jóse....

Totta og sleikja

Börn eru svo ágæt og fágæt. Þau hafa yndi af að totta kvenmannsbrjóst eða pela sem hvítvoðungar og fátt hafa þau meira yndi af en góðum sleik af sleikibrjóstsykri þegar á líður árafjöldan. Nú þykist ég viss um að saurugar hugsanir léku um huga lesanda míns þegar hann sá fyrirsögnina. Við hann segi ég bara, svei þér perverta músin þín.

p.s.

Þetta blogg er höfðað til hins eina lesenda míns eingöngu, ef annar skyldi ramba inn bið ég afsökunar á þessum einkahúmor.

Mótorhjóla dagbækurnar

Horfði á fyrirtaks mynd í dag um æskuferð félaga Che með vini sínum frá Argentínu til Venesúela. Myndin er byggð á dagbókum Che sjálfs en hann hélt dagbækur meira og minna sín fullorðinsár. Virkilega vel gerð mynd sem hélt manni hugföngnum í tvo tíma og tónlistin í henni var skrambi fín. Í myndinni virkar hin mikla byltingarhetja á Kúbu, Che sem ósköp venjulegur lífsglaður ungur maður, heiðarlegur í hvívetna og kraftmikill þrátt fyrir astman. Sumir telja að þesi ferð hafi verið hvatinn að umbreytingu Che úr hlédrægum háskólastúdent í eldheitan byltingarmann. Ég er ekki frá því að greina megi slík merki í myndinni en ég læt lesenda mínum um að draga ályktun út af fyrir sig.

Smáa letrið

Hmrumpf....

Bambi fór ásamt frú í dag og ætlaði að bóka miða að heimsækja Sveik. En Bambi hafði áður unnið miða fyrir einn til Prag og því þurfti einungis að greiða fyrir frúna.

Helvítis smáa letrið kom þó í veg fyrir pöntun í bili. Flugferðin sem Bambi vann var nefnilega afskaplega niðurnjörvuð í skilmálum. til dæmis mátti Bambi bara fara á klósettið einu sinni hvora leið, hann varð þó að kaupa og innbyrða að minnsta kosti 10 bjóra um borð í hvorri ferð án þess að verða fullur. Einnig var bambi skikkaður til að kaupa tollfrjálsan varning um borð fyrir að minnsta kosti 30 þúsund og hann mátti ekki undir neinum kringumstæðum bögga starfsfólkið um einhverskonar þjónustu.

Nei þessu lýgur Bambi að vísu en smáa letrið var þó til staðar á umræddri gjöf og stíft farið eftir því. Miðinn gildir bara frá mánudegi til fimmtudags í Mars eða Apríl sem hljómaði ekki svo illa í fyrstu. En vandamálið er bara það að lent er í Prag að kveldi Mánudags og lagt af stað heim eldsnemma morguns fimmtudag. Semsagt tveir dagar sem færi gefst á skoðunarferðum og pylsuáti. Bamba fannst það of lítið og vildi athuga hvort ekki væri smuga að koma heim á mánudegi og vera þannig í viku þó gjöfin góða segði til um annað ef hann borgaði eitthvað aukreitis. Það var algerlega af og frá og því ætlar Bambi að bíða með bókun enn um sinn.

Sveik

Hef einsett mér að lesa þá frábæru bók aftur. Las hana nokkuð oft hér í denn en nú er ekki úr vegi að endurnýja kynnin þar sem möguleiki er á pílagrímsferð. Dásamleg bók og dásamlegur kall hann Sveik. Ég veit þó ekki hvort tími leyfir frístundalestur þar sem ég er gersamlega að kafna í lærdómi, vinnu og almennum barlómi. Ég held að það hafi aldrei verið jafn mikið um verkefnavinnu í skólanum og á þessari önn og þó hefur þetta verið ýfrið fyrir. Ég sem hélt að þegar maður er kominn svona langt á leið í náminu þá slaknaði örlítið á þessum déskota. Auðvitað eru sum af þessum verkefnum bráðskemmtileg en önnur hreint arfadrepleiðinleg. Bæði þarf þó að vinna en þannig er víst lífið.

Prag

Eins og sjá má af öfundarkommentum og almennu skítkasti hér fyrir neðan þá eru sumir afbrýðisamir út í Bamba. Bambi vann nefnilega ferð til Prag ....Júbbí...liggaliggalá. Nú er bara að finna hentugan tíma og heldri manna hótel helst í miðbænum og skella sér ásamt frú Bambi. Ég hef það eftir áræðanlegum heimildum að það sé bara nokkuð gaman í Prag, það var mús sem hvíslaði því að mér :) Hlakka til að komast að því hvort það sé ekki satt..

Árshátíð

Í kvöld og því enn nóg að gera. Vonandi verður viðurgjörningur góður og vínið ósúrt. Svo er líka happdrætti, kannski að Bambi vinni! Nei grefillinn hafi það, það gerist líklega ekki. En vonandi verður fjör....

Sá sem hefur nóg að gera

Tekur fljótlega eftir því að tíminn er naumt skammtaður. En það ber ekki að sýta því eins og maðurinn sagði: Það góða við tímann er að það kemur alltaf meira af honum. Ég hlýt því að vera bjartsýnn á að allt klárist einhvernveginn og þó lítill tími sé í dag þá kemur meira af honum á morgun.

Kúba

Mig langar orðið svo til Havana að mig verkjar. Mig hefur lengi langað en nú er þetta orðið óbærilegt. Ástæðan....Ég er í kúrs sem heitir borgir og ferðamennska og þar erum við að læra um Mexíkó og Kúbu. Sá sem kennir okkur er menntaður í Mexíkó og hefur verið oft sem fararstjóri á Kúbu. Hann er hreint frábær kennari, segir skemmmtilega frá og notar kvikmyndir og tónlist í kennslu til að undirstrika andrúmsloftið sem hann er að koma til skila í fyrirlestrunum. Þetta hefur leitt til þess að ég kem syngjandi einhverja bulluspænsku heim úr hverjum tíma og spyr frú Bambi dreymandi hvenær við eigum að fara til Kúbu. Enda hefur þessi líflega kennsla gert það að verkum að ég hef drukkið í mig fróðleik um Kúbu og Mexíkó og er jafnvel farinn að leita uppi efni sjálfur á bókasöfnum. Hreint dæmalaust frábærir tímar sem maður vill ekki að taki enda. Viva Cuba

Hópvinna

Ég er algerlega kominn með upp í kok af hópvinnu sem virðist vera eitthvað sérlega inn fyrirbæri í ferðamálafræðinni. Hópvinna þetta og hópvinna hitt, það liggur við að það séu fyrirskipaðar hópferðir á klósettið. Mér skilst að þessi þunga áhersla á hópvinnu sé tilkominn vegna þess að þegar við förum út í atvinnulífið þá byggist allt af hópefli og þvílíku. Vissulega er það rétt en öllu má nú ofgera. Nú til dæmis á ég og minn ágæti hópur að skrifa saman um upplifun á áfangastað. Upplifun er nokkuð persónubundið fyrirbæri og mér er því fyrirmunað að skilja af hverju það er verið að gera slíkt verkefni að hópverkefni. Kannski að við náum að bonda svo vel að við skrifum þetta sem einn hugur. Nei það held ég fjárann ekki...

Fótbolti

Bambi hefur þurft að þjást hin síðustu ár. Hann er nefnilega Valsmaður og púlari, en þessi fornfrægu félög hafa ekki verið að gera neinar rósir undanfarin misseri. En nú er ekki útséð með bjartari tíð allavega hvað Val viðkemur, Liverpool þarf einhvern tíma enn til að hysja upp um sig brækurnar. Val hefur gengið alveg bærilega undanfarið og sankað að sér mönnum en þó leyfir Bambi sér varla að vona lengur að allt gangi upp. Það hefur verið svo fjári sárt að falla trekk í trekk undanfarin ár að best er að halda væntingum í lágmarki. En...... áfram VALUR

Böh

Hmm sá nú barasta enga dauga á draugasafninu. Einhver unglingstelpa virðist vinna við að spretta fram og segja böh en ég tel næsta víst að hún var sprellifandi. Nokkuð sætt að sjá tvíhöfða lömbin og illa uppstoppaða selinn en ég hafði ekki þolinmæði í að heyra 16 draugasögur í trekk svona ófullur. Veðrið skartaði sínu fínasta á Stokkseyri öfugt við þokuna hér og merkilegt nokk þá var alveg mökkur af flugum þarna og það í febrúar, kannski að það hafi verið svona afturgöngu eða afturflugs flugur? Sá enga eyri þrátt fyrir töluverða leit og verða það að teljast vonbrigði.

Stokkseyri

Og Eyrarbakki. Líklega er einhver eyri þar í nágreninu, hef einsett mér að kanna það nánar á morgun. Námsferð í skólanum sjáðu til, enda fylgja víst ferðalög ferðamálafræði. Svo eigum við að skoða draugasafnið, hef heyrt að það væri prump en sjáum til kannski sé ég draug.

Tussulegur

Afsakið orðbragðið en Bambi kúturinn er búinn að vera eitthvað hálf tussulegur í dag. Eða var það kannski tuskulegur? Eníhú já þá er ég ekki frá því að ég hafi unnið yfir mig í vikunni. Ekki vanur svona puði eftir letina undanfarið en það ætti að lagast. Kjúklíngur Ítalíanó tókst með afbrigðum í gær og verður líklega eldaður oftar. Óver and át...Bambi

Bambabrella

Púff vúff hvað það er fínt að helgin er að koma. Nú er Bambi á leið heim að elda kjúkling ítalíanó
fyrir frú Bambi. Það verður sannkölluð Bamababrella.

Ferðamálafræði

Bambi fékk það verkefni að skrifa grein í stíl við bakþanka í fréttablaðinu. Um að gera að henda því hérna inn..

Ferðamálafræði

Það liggur við að ég sé farinn að svara með þjósti. Nú ber ekki svo að skilja að ég sé sérlega ólyndur eða óþolinmóður að eðlisfari en allt hefur sín takmörk. Nei ég er ekki að verða leiðsögumaður og nei ég stefni heldur ekki á að vinna við farseðlaútgáfu á ferðskrifstofu. Ég er hvorki í Menntaskólanum í Kópavogi né í leiðsögumannaskólanum, ég stunda nám við Háskóla Íslands. Ég stefni á að verða ferðmálafræðingur. Þetta virðist valda misskilningi í nær öllum tilfellum og er ástæðan fyrir uppsafnaðri gremju minni.

Auðvitað er þetta fáfræði í flestum tilvikum þar sem námið er nýtt og því eðlilegt að fólk rugli því saman við námið í hinum skólunum sem á sér lengri sögu. En oft eru þetta þó hreinir og beinir fordómar gagnvart náminu sem stafa af fáfræði gagnvart greininni sem slíkri.

Fólk virðist nefnilega telja að það þurfi hreint ekkert að gera fyrir gestina sem heimsækja okkur í æ ríkari mæli. Það verður jú vart við þá rápandi um miðbæinn á sumrin í skærgulu vetrarjökkunum sínum á meðan við heimamenn klæðumst stuttbuxum en telja að þeir birtist og fari af sjálfsdáðum líkt og farfuglarnir án þess að nokkuð annað þurfi til. Auðvitað er það ekki svo. Til að fyrirbyggja allan misskilning í framtíðinni ætla ég að útskýra fyrir þér lesandi góður í eitt skipti fyrir öll um hvað málið snýst .

Ímyndum okkur safn, þar sem á veggjum sýningarsalanna hanga listaverk. Tilgangur þeirra sem heimsækja safnið er að njóta verkanna og horfa á þau með eigin augum. En hvað myndi gerast ef safnstjórinn myndi taka upp á því einn daginn að afnema allar fjöldatakmarkanir inn í safnið og reyna að græða sem mest? Hann stæði uppi með yfirfullt safn í einn dag og myndi líklega þéna vel þann daginn en svo myndu viðskiptin hrynja. Gestirnir á safninu myndu ekki sætta sig við að þurfa að olnboga sig í gegnum mannþröng til að geta skoðað verkin, þeir myndu ekki sætta sig við langar biðraðir á klósettin og hálftíma bið eftir kaffisopa á teríunni. Þeir myndu aldrei koma aftur minnugir fyrri reynslu og safnið færi á hausinn.
Það sama gæti átt við um ferðamenn sem sækja okkur heim. Það þarf að hlúa að þeim og veita þeim þjónustu. Það þarf að skipuleggja aðstöðu og stýra fjölda inn á ákveðin svæði svo að upplifun gestanna verði ekki skert. Það þarf að byggja innviði og hlúa að vinsælum svæðum svo þau verði ekki fyrir skaða út af átroðningi. Það þarf að vernda menningu heimaþjóðarinnar og tryggja að óvild skapist ekki í garð ferðmannanna þegar fjöldi þeirra eykst. Það eru kannski ekki hundrað í hættunni eins og staðan er í dag þar sem „einungis“ um 300 þúsund ferðamenn komu á síðasta ári en spár gera ráð fyrir algerri sprengingu í framtíðinni og við megum eiga von á hvorki meira né minna en 3,2 milljónum ferðamanna árið 2020. Þið getið því rétt ímyndað ykkur að aðgerða og skipulagningar er þörf og það er nákvæmlega það sem ég er að læra, nákvæmlega það sem ég ætla að vinna við í framtíðinni. Nákvæmlega ferðamálafræðingur.

En nú gætu einhverjir hugsað sem svo: Viljum við nokkuð fá alla þessa ferðamenn til landsins? Er þetta ekki alltof mikið vesen fyrir ekki neitt?

Þá er því til að svara að útflutningstekjur vegna ferðamanna voru árið 2003 hvorki meira né minna en 13% af heildarkökunni sem er svipað og álbræðslurnar eru að gefa okkur í aðra hönd. Ef spár ganga eftir þá á þessi tala eftir að hækka verulega í framtíðinni. Einnig má nefna að ferðaþjónustan skapar heilmörg stöðugildi, ekki síst á landsbyggðinni þar sem sár þörf er á meiri fjölbreytni í atvinnutækifærum. Það er því ekki spurning að það er vel þess virði að hafa gestrisnina í hávegum og bjóða eins mörgum til okkar og við og landið þolum. Það er okkur til hagsbóta auk þess sem við getum verið stolt af að deila og leyfa öðrum að njóta okkar stórkostlega lands.

Það er okkur til hagsbóta að mennta fólk sem getur liðsinnt, skipulagt og komið að ferðmálum á fræðilegan hátt. Það er okkur til hagsbóta að útskrifa ferðamálafræðinga frá Háskóla Íslands.

Neyðin kennir...

Nöktum Bamba að vinna! Eftir einn kúrs í rekstrarhagfræði og einn í markaðsfræði hefur Bambi komist að því að hann bara fær enga peninga nema með því að vinna. Eða enga er kannski ofsagt, Bambi fékk einhverja hungurlús sem kallast námslán fyrir það eitt að taka áðurnefnda kúrsa og nokkra til en þau dugðu varla fyrir aumum hrísgrjónapakka. Þannig að Bambi einhenti sér út á vinnumarkaðinn og er svosem engin vorkunn af því og nú eru allar hillur fullar af hrísgrjónum. En eitthvað virðist hafa snarminkað tíminn í annað stúss og þar á meðal námið. En grefillinn hafi það þetta hefst allt að lokum.

Þú veist hvernig þetta er

Gerðist ári menningarlegur og skrapp í leikhús. Þrælfínt stöff hjá þeim í Stúdentaleikhúsinu,þetta var leikhús sem rokkaði. Hressandi að sjá formið brotið svona skemmtilega upp og krakka sem voru virkilega að njóta þess að leika. Ekkert sem hægt er að nöldra yfir nema kannski að sum atriði voru teygð alveg að brúninni. En heilt yfir hnifskörp og skemmtileg ádeila hjá þeim.

Ussususs

Alveg hreint yfirdrifið hvínandi nóg að gera hjá Bamba. Var rétta að skríða inn eftir fróðlegan fyrirlestur í Þjóðminjasafninu og næ rétt að pústa til tvö. Þá liggur leiðin í skólann aftur og svo beint þaðan í vinnuna þar sem ég svara ómþýðri röddu í símann til tólf. Áætluð lending í rúmi við hliðina á væntanlega steinsofandi frú Bambi er því ekki fyrr en að verða eitt. Jedúddamía hvað Bambi á bágt.

Morgunsárið

Hvurn grefillinn á þetta orð eiginlega að þýða? Jæja það var svosem ekki tilgangurinn með rausi dagsinns. En alltént þá er Bambi vaknaður í morgunsárið og byrjaður að blaðra. Það gefst víst lítill tími til þess annars í dag þar sem dagkráin er þéttskipuð. Bambi þarf að vinna til átjánhundruð og þá tekur við vísindaferð á vinnustaðnum , hann býst því ekki við að koma heim fyrr enn eitthvaðhundruð einhverntímann. Bambi býður dyggum lesenda góða helgi og vonar að hún verði hin ágætasta.

Sumsé

Sat í þessu dýrindis fína barnafmæli. Börnin voru óttalega þæg og þægileg í umgengni þannig að lítið var um óbærilegan hávaða sem oft fylgir slíkum samkundum. Svo sást ekki vín á nokkrum manni. En rúsínan í pylsuendanum var þó að Bambi fékk uppáhalds matinn sinn Humarsúpu og át svo mikið að hann situr í keng með vindverki og vanlíðan meðan þetta er ritað.

Bullar og sýður á Bamba

Argh!!! Bambi var eins og dyggir lesendur vita búinn að festa sér magnara frá Ameríku. Það er skemmst frá því að segja að eftir langa og stranga bið þá kom loks gripurinn í dag...eða ekki! Bambi fékk tilkynningu í dag að hann gæti loks sótt magnarann góða inn í Kópavog og Bambi hreint dreif sig af stað eftirvæntingafullur og glaður. Þegar heim var komið var auðvitað kassinn opnaður hið snarasta og Bambi bjóst við að sjá loks dýrðina með berum augum. En sjá, þegar litið var ofan í kassan var þar hreint engin magnari. Bara gamall tóner, eitt karton af ljósritunarpappír og búnt af bæklingum frá music city. Þessar glæpamyndir frá Ameríku eru greinilega allar sannar! Sem betur fer var Bambi svo forsjáll að tryggja sendinguna þannig að fjárhagstjón ætti að vera lítið. En það verður líklega bið á frekari netverslun á þessu heimili

Ég mótmæli

Nær aldrei. Ja eða kannski svona að ég nöldri með sjálfum mér eða í mesta lagi við kunningja yfir kaffibolla. En aldrei opinberlega.. Ég held ég sé algerlega hinn ídeal steríótýpíski Íslendingur að þessu leyti, margt sem fer í mig og mikið um órétti en það er bara svo fjandi kallt niðrá Austurvelli.

Stundum...

Er maður svo latur að maður nennir varla að anda. Ég hef tekið eftir því að slíkt ástand á sér stað nær oftast á mánudögum. Auðvitað er alveg hellingur sem ég ætti að vera að gera. Verkefnin narta í hælanna á mér hvert á fætur öðru en á dögum eins þessum þá liggja þau óhreyfð. Á morgun segir sá lati, segir sá lati!

Tja

Hvað er það undarlegasta sem þú hefur borðað? Þetta þykir Bamba skemmtileg spurning en hann er víst ekki svo frægur að fá inni í blöðunum og því spyr hann sig sjálfur. Tja ég ætti líklega að segja Bjór,sko dýrið þú veist ekki venjulegur bjór. Og svo hefur maður náttúrulega smakkað dádýr,hjört,björn og meira að segja djúpsteiktan krókódíl. En það alfurðulegasta sem ég hef smakkað hlýtur að vera þegar ég í einhverju forheimsku kasti tók upp á því að panta mér fisk á subbulegum stað í París. Það sem kom úr eldhúsinu var einhvers konar gul stappa sem líktist einna helst plokkfisk. Eina bragðið sem ég greindi var hvítlaukur og ég hef ekki hugmynd um hvort það var nokkur fiskur í þessu yfir höfuð, en eftir á að hyggja vona ég ekki. Það skal tekið fram að þessi réttur var látinn að mestu leyti óhreyfður.

Olé

Ég gerðist suðrænn og skellti mér á Tapas barinn í kvöld ásamt frú Bambi. Alveg fannst mér það fyrirtaks staður og maturinn í hæsta máta ágætur. Hingað til hefur Bambi ekki þótt mikill matmaður og stundum hreinlega átt í vandræðum með að klára diskinn sinn. Bamba hreinlega leiðist stundum að borða og gerir það af skyldurækni einni. En á þessum ágæta stað bar svo við að Bambi leifði engu af diskunum sínum. Snilldar hugmynd svona smáréttir. Héðan í frá smáréttir í öll mál, takk fyrir!

Ó

Mig auman, mikið déskoti er ég þreyttur eftir daginn. Búinn að púla í allan dag til þess að eiga aur fyrir lífsins nauðsynjum og ónauðsynjum. Nauðsynji eru nauðsynleg og ónauðsynji krydda tilveruna. Að vísu gæti orðið púla gefiið ranga mynd af vinnu Bamba sem felst í því að svara í síma allan liðlangan daginn. Er ekki púl meira svona tengt við að stafla sveittur hveitisekkjum í skemmur eða vinna við að flytja píanó? Og þó Bamba finnst að símsvörun geti verið argasta púl, maður verður bara öðruvísi þreyttur.

Shopusa

Bambi er nú á þriðju tilraun í að reyna að verlsa eitthvað frá henni Ameríku. Tækjafíkillinn í honum komst að því að það bráðvantar heimbíómagnara á heimilið. Svo er þetta líka svo fjandi ódýrt í Ameríku,bara næstum gefins. En heilmikla þolinmæði þarf þó til að standa í slíkum viðskiptum. Í fyrstu tilraun var varan uppseld og í annari þá vildu þeir ekki samþykkja íslenskt krítarkort. En pöntunin gekk í gegn hjá Amazon og nú er það helsta dægradvölin hjá Bamba að rekja vöruna út um króka og kima Bandaríkjanna. Svo er bara að krossa fingur og vona að draslið berist heim í stofu.

Um hægðir eða ekki

Í dag hafði ég ánægjulegar og temmilega áreynslufullar hægðir. Þurfti rétt aðeins að rembast en ekki svo að þetta væri harðlífi. Nauts...hvað heldurðu að Bambi sé slíkur dóni að hann sé farinn að blogga um skít! Bambi hefur hreint engar hægðir haft í dag og getur því ekkert sagt um gæði þeirra, þetta var bara plat..tíhí. En færsla dagsins er komin :)

Kæra dagbók

Í dag fór ég í skólann, það var gaman. Ég lærði fullt fullt um einhverja Azteka sem voru víst alltaf að skera hjartað úr hvor öðrum og éta svo bara kjötið. Öllum krökkunum fannst það geðveikt ógeðslegt en kennarinn sagði bara að svona hefði þetta verið. Í kvöld er pasta í matinn hjá mér.

Degi hallar

Þá er enn einum dýrðardeginum lokið og hann var nokkuð viðburðarsnauður takk fyrir. Það er ekki einu sinni hægt að bölsótast yfir veðrinu,bara blessuð blíða miðað við árstíma. Annars er námið komið á hvínandi skrið og verkefni hlaðast inn hægri vinstri. En ef ég þekki Bamba rétt þá verður öllu frestað sem frestað getur fram á síðustu stundu og þá situr Bambi sveittur við að vinna upp syndirnar. Alveg hreint merkilegt hvað maður lærir aldrei af reynslunni!

Kjamms á kjamma í Kjós

Þorrablótið var hreint yndælt um helgina. Ekki get ég sagt að ég hafi smekk fyrir öllu súra gumsinu sem var á boðstólum en ég hrúgaði vel af sviðasultu og rófustöppu á diskinn minn. Ég nagaði líka eins og eitt andlit bara upp á stemminguna, gekk illa að ná nokkru kjöti af þessu. Eftir hausaátið var svo stiginn dans langt fram á nótt og almenn gleði í gangi.

Gumbo

Gott ef það var ekki mynd, gætu þorrablót heitið Gumbo á útlensku?

Ómeti

En maður kvartar ekki ef brennivínslögg er með. Bambi brunar á þorrablót á morgun og þá aðalega fyrir skemmtanina því ekki er hann hrifinn af matnum. En Bambi hefur komist af því í gegnum tíðina að át á ónýtum mat er eingöngu afsökun fyrir almennum hittingi og svalli fram á nætur. Bambi er maður í blót. Andskotinn!!!

Haloscan commenting and trackback have been added to this blog.

Morgunskíma

Eða hreint ekki! Það er bara svartnætti á þessum árstíma og lítil skíma í gegnum gluggan nema af götuljósunum. Mér leiðist þetta svartnætti líkt og svo mörgum öðrum. En vorið er handan við hornið!

Æ

Æ,,,,, þyrfi núna svolítinn innblástur. Þessi færsla er um ekki neitt.

Örleikrit nr.2

Í búðinni bollan hlær

Sviðið er kjörbúð

Afgreiðslukona: (grátandi) Af hverju kallaðirðu mig feitabollu

Kúnni: Nei, ég sagði hvar eru fiskibollurnar.

Afgreiðslukona: Nú

Tjaldið

Örleikrit nr.1

Í mykjunni býr ástin


Á sviðinu hefur verið komið fyrir all stórum mykjuhaug. Upp úr haugnum standa eingöngu höfuð tveggja leikara en allt annað er hulið í mykjunni.

Maður eitt: Varstu að prumpa?

Maður tvö: Nei!

Tjaldið

Brrr

Úff þetta er nú meiri veturinn. Það kallar á meiriháttar átak að koma sér fram úr rúminu og ekki síður er erfitt að koma sér úr húsi. Hvernig var það átti ekki að fara að hlýna á skerinu sökum gróðurhúsaáhrifanna? Það ber alltént lítið á slíku þennan veturinn! Svei mér þá, það er ekki laust við að ég væri til í smá áhrif og hita í staðinn fyrir þetta fjandans frost.

Ég heiti

Ekki Bambi svona í alvörunni en nafnið er til og leyfilegt er að skíra barnið sitt Bamba. Einnig er til fullt af fínum nöfnum fyrir nýungargjarna foreldra sem vilja aldeilis að þeirra krógi skeri sig úr fjöldanum. Má þar nefna nöfn eins og Ljótur,Ljúfur og Álfur. Hver myndi ekki bera nafnið Ljótur Álfur með stolti nú eða Ljúfur Bambi! Að ég tali nú ekki um nafn sem er víst til í dag, kvenmannsnafnið Mist Eik. Svosem hið fallegasta nafn við fyrstu sýn en prófið bara að lesa það upphátt! Það er ég viss um að foreldrarnir gerðu ekki, nú eða þau skilja ekki stafkrók í ensku!

Prufa

Bambi er beztur